Noch ein Gedicht: "Zwische de Johre"

 

Et Zimmer rüch noh Tannejrön,

 de Kääze sin verbrannt.

 Om Sofa sitz de ahle Möhn

 Me‘m Streckstrump in d‘r Hand.

 

Drei Kugele am Baum kapott.

 D‘r Ühm verqualmp de Luff.

 De Mam säht:“ Dun ding Pief ens fott!

 Uns schöne Chressdachsstuff!“

 

 Däm Köbesje sing Schöckelpäd

 Es ald jet invalid.

 Et Lies, et Föttche an d‘r Ääd,

 lötsch jrad am Finsterkitt.

 

 Däm Schokolade-Zinter-Klos

 Fählt ald d‘r halve Kopp,

 un unsre Schäng sich, us ner Blos,

 höösch voll mit Printe stopp.

 

 Dä Pap loort en d‘r Äujelkess

 Dat Springe vun d‘r Schanz‘

 Un merk nit, dat dä kleine Chreß

 Sing Uhr „määt widder janz“.

 

 Et Drüggche singk: „Oh Tannenbaum!“

 Un schnigg janz lus un brav,

 vum Plattühm singem Mantelsaum

 e Stöck för‘t Kreppche av.

  

Et Liesje läuf me‘m Kammerpott

 Quer durch de lieserbahn.

 Dä Schäng bälk los: „Jank fott, do Krott!“

 Un fängk ze bauze an.

 

 

Dä Vatter floch: „No sid jitz stell!

 Söns jitt et hück noch Klöpp!

 Wann ich de Sportschau loore well…!“

 Jitz bellt och noch d´r Möpp.

 

Em Nervehus spillt wä Klaveer –

 E herrlich Stöck en Moll.

 De Mam söck wöödig jet Papeer.

 Däm Lies sing Botz is voll.

  

„Potz Zappermoot!“, dä Vatter säht

 Un jitt däm Chreß en Fimm.

 „Wat dä us mingem Ührche määt!?“

 Vum Kirchturm schleiht et „Bim“!

 

 Dä Ühm klopp flöck sing Pief jitz us

 Un röf: “Maach voran Möhn!

 Et es baal Aach, mer jon noh Hus,

 he is et nit mih schön!“

 

Dä Hungk hüült op, et Liesche krieht,

 dä Vatter bläut dat Klein.

 „Verflix noch ens un zojenieht!

 Ding Woll hängk öm ming Bein!“,

  

schängk jitz dä Ühm. Dann fällt hä hatt

 un sitz d’r Längde lang,

 met singer Fott dä Bahnhof platt

 un och dä Schinnestrang.

 

Jitz es de Chreßdachsrauh vorbei.

 De Mam kritt jriese Hoor,

 wie vun d’r Stang dä Papajei

 noch japsch: „Jo Pross Neujahr!“

 (Ott Valberg)

 


Kommentar schreiben

Kommentare: 0